ഇതൊരു കുറ്റപ്പെടുത്തലല്ല, മറിച്ച് സത്യത്തിന്റെ വെളിപ്പെടുത്തലാണ്.
ഇതൊരു ശിക്ഷയല്ല, മറിച്ച് കരുണയിലേക്കുള്ള ദൈവത്തിന്റെ സ്നേഹപൂർണ്ണമായ ക്ഷണമാണ്.
നമ്മുടെ പാപം എത്രമാത്രം ആഴമുള്ളതാണെന്നും, അതിനേക്കാൾ എത്രയോമടങ്ങാണ് ദൈവത്തിന്റെ അളവില്ലാത്ത സ്നേഹമെന്നും അന്ന് ലോകം തിരിച്ചറിയും.
എന്താണു സംഭവിക്കാൻപോകുന്നത്?
മറഞ്ഞുകിടക്കുന്ന പാപങ്ങൾ വെളിച്ചത്തുവരും. ഉറങ്ങിക്കിടക്കുന്ന മനസ്സാക്ഷികൾ ഉണരും. കാപട്യത്തിന്റെ മുഖംമൂടികൾ അഴിഞ്ഞുവീഴുകയും ആത്മീയാന്ധത നീങ്ങുകയും ചെയ്യും. അന്ന് പലരും തങ്ങളുടെ ആത്മാവിനെ ആദ്യമായി കണ്ണാടിയിലെന്നപോലെ കാണും.
അന്ന് മനുഷ്യൻ വിങ്ങലോടെ പറയും: "ദൈവമേ, ഞാൻ നിന്നെ വിട്ടുപോയിരുന്നു… പക്ഷേ നീ എന്നെ ഒരിക്കലും കൈവിട്ടില്ലല്ലോ."
എന്തിനാണ് ദൈവം ഇങ്ങനെയൊരവസരം നൽകുന്നത്?
ലോകത്തെ ഭയപ്പെടുത്താനല്ല, മറിച്ച് നഷ്ടപ്പെട്ടുപോകുന്ന മക്കളെ തിരികെവിളിക്കാൻ. കാരണം, ദൈവമാഗ്രഹിക്കുന്നത് ശിക്ഷിക്കാനല്ല, രക്ഷിക്കാനാണ്.
ഇതൊരുപക്ഷേ, കരുണയുടെ അവസാനമഴയായിരിക്കും. ഇതിനുശേഷം വരുന്നത് നീതിയുടെ കാലമാണ്.
ഇനിക്കാത്തിരിക്കാൻ സമയമില്ലല്ലോ!
- 📍 വിനയത്തോടെ പ്രാർത്ഥിക്കുക.
- 📍 നിരന്തരമായി ആത്മപരിശോധന നടത്തുക.
- 📍 സത്യസന്ധമായ മാനസാന്തരത്തിന് തയ്യാറാവുക.
പരിശുദ്ധാത്മാവിനോട് നമുക്കു പ്രാർത്ഥിക്കാം: "എന്റെ ഹൃദയത്തെ അവിടുത്തെ പ്രകാശത്താൽ നിറയ്ക്കണമേ."
കാലത്തിന്റെ അടയാളങ്ങൾ
നാം ജീവിക്കുന്നത് മധുരമായ ഒരു കാലഘട്ടത്തിലല്ല. നാം ചിരിക്കുമ്പോൾ ലോകം അടിത്തറയിളകി കുലുങ്ങുകയാണ്. നാം ഉറങ്ങുമ്പോൾ മുന്നറിയിപ്പിന്റെ മണികൾ മുഴങ്ങിക്കൊണ്ടിരിക്കുന്നു. എന്നിട്ടും നാം പറയുന്നു: "ഇതെല്ലാം പതിവല്ലേ... നാളെ നോക്കാം."
പക്ഷേ, നാളെ നീയുണ്ടാകുമെന്ന് എന്താണുറപ്പ്?
ചുറ്റുമൊന്നു കണ്ണോടിക്കൂ. വായു മലിനമാകുന്നു, ജലം വിഷമയമാകുന്നു. മനുഷ്യൻ മനുഷ്യനെ ഭയപ്പെടുന്നു. അമ്മമാർ മക്കളെയും മക്കൾ മാതാപിതാക്കളെയും തിരിച്ചറിയാത്തവിധം ബന്ധങ്ങൾ തകർന്നിരിക്കുന്നു. മയക്കമരുന്നിന്റെ ലഹരിയിൽ തലമുറകൾ നശിക്കുന്നു. അതിർത്തികൾ ലംഘിച്ച്, രാജ്യങ്ങൾ പരസ്പരം പോരടിക്കുന്നു. ഭരണാധികാരികൾപോലും നിസ്സഹായരാകുന്നു.
ഇതു സാധാരണകാലമല്ല; അന്ത്യകാലത്തിന്റെ മുന്നറിയിപ്പുകളാണ്. മനസ്സാക്ഷിയുടെ പ്രകാശനം വരുന്നതിനുമുമ്പ് വലിയ പരീക്ഷണങ്ങൾ ലോകത്തെ കാത്തിരിക്കുന്നു.
അന്ന് മരുന്നോ ഭക്ഷണമോ ഉണ്ടാകില്ല. കുടിവെള്ളത്തിന് സ്വർണ്ണത്തേക്കാൾ വിലയേറും. അന്ന്, "നിനക്ക് എത്ര പണമുണ്ട്? എത്ര വിദ്യാഭ്യാസമുണ്ട്?" എന്ന ചോദ്യങ്ങൾക്കു പ്രസക്തിയുണ്ടാകില്ല. എവിടെയാണഭയം?
അമ്മയായ പരിശുദ്ധമറിയം പറയുന്നു: "നിങ്ങൾ എന്റേതായാൽ, നിങ്ങൾക്ക് ഒരഭയമുണ്ടാകും."
ശ്രദ്ധിക്കുക: എല്ലാവർക്കുമല്ല, ആഗ്രഹിക്കുന്നവർക്കുമല്ല, മറിച്ച് 'അമ്മയുടേതാകുന്നവർക്ക്' മാത്രം. ആ അഭയം പണമോ, സ്വാധീനമോ, ലൗകികബന്ധങ്ങളോ അല്ല. അത് ഈശോയുടെ തിരുഹൃദയമാണ്.
ചോദ്യമിതാണ്: നിങ്ങൾ ആ ഹൃദയത്തിനുള്ളിലാണോ അതോ പാപത്തിന്റെ ബന്ധനത്തിലാണോ?
കൂദാശകളിലേക്കുള്ള മടക്കം
ഇന്ന് എത്രപേർ കുമ്പസാരമെന്ന കൂദാശയെ അവഗണിക്കുന്നു? "അച്ചനോടു പറയാൻ ലജ്ജയാണ്", "ദൈവം എല്ലാം അറിഞ്ഞോളും" എന്നൊക്കെയുള്ള ഒഴികഴിവുകൾ നമ്മൾ കണ്ടെത്തുന്നു.
എന്നാൽ ഓർക്കുക: അനുതാപപൂർണ്ണമായ കുമ്പസാരത്തിലൂടെമാത്രമേ യേശുവിന്റെ തിരുരക്തം നമ്മുടെ ആത്മാവിലേക്ക് ഒഴുകുകയുള്ളൂ. ആ തിരുരക്തത്താൽ കഴുകപ്പെടാതെ പാപം മായ്ക്കപ്പെടില്ല. പാപം കഴുകപ്പെടാത്ത ഒരവസ്ഥയിൽ മനസ്സാക്ഷിയുടെ പ്രകാശനം സംഭവിച്ചാൽ, നിങ്ങൾക്ക് ഒളിച്ചോടാനിടമുണ്ടാകില്ല.
അന്ന് ന്യായീകരണങ്ങളില്ല. നിങ്ങളും ദൈവവുംമാത്രം.
അന്ന് ഹൃദയംതകർന്നു നിങ്ങൾ പറഞ്ഞേക്കാം: "എനിക്കു സമയമുണ്ടായിരുന്നു... എന്നിട്ടും ഞാൻ അതു പാഴാക്കി."
പരിശുദ്ധകുർബാനയെ നിങ്ങൾ എങ്ങനെയാണു സമീപിക്കുന്നത്? പതിവായിട്ടാണോ? വല്ലപ്പോഴുംമാത്രമാണോ? ഭയഭക്തിയോടെയാണോ അതോ അശ്രദ്ധയോടെയാണോ? പ്രസാദവരാവസ്ഥയിലാണോ അതോ പാപാവസ്ഥയിലാണോ?
നിങ്ങൾ സ്വീകരിക്കുന്നത് വെറുമൊരപ്പമല്ല, യേശുവിന്റെ ജീവനുള്ള ഹൃദയമാണ്. ആ ഹൃദയത്തിന് നിങ്ങളെ രക്ഷിക്കാൻ കഴിയും; എന്നാൽ അയോഗ്യതയോടെ സ്വീകരിച്ചാൽ അതു ശിക്ഷാവിധിക്കും കാരണമാകും.
വാതിലടയുന്നതിനുമുമ്പ്
ഇതൊരു ഭീഷണിയല്ല, പരമമായ സത്യമാണ്. ദൈവം ഇനി ഉച്ചത്തിൽ വിളിക്കില്ല. അടുത്തത് നിശബ്ദമായ, എന്നാൽ ശക്തമായ പ്രകാശനമായിരിക്കും. അന്ന് "ആരുമെന്നോടു പറഞ്ഞില്ല" എന്നു നിങ്ങൾക്കു പറയാനാവില്ല.
ഇന്നാണ് ആ ദിവസം. ഇപ്പോളാണ് ആ സമയം. വാതിലടഞ്ഞാൽ, പിന്നെ എത്രമുട്ടിയാലും അതു തുറക്കപ്പെടണമെന്നില്ല.
നിങ്ങളുടെ ഹൃദയത്തോടു ചോദിക്കുക: "ഞാൻ യേശുവിന്റെ ഹൃദയത്തിനുള്ളിലാണോ?"
ഇല്ലെങ്കിൽ, ഇന്നുതന്നെ കുമ്പസാരത്തിലേക്കു മടങ്ങുക. പരിശുദ്ധകുർബാനയെ ഭയഭക്തിയോടെ ആരാധിക്കുക. പ്രാർത്ഥനയിലേക്കു തിരികെ വരിക. ഇതൊരു 'ഓപ്ഷൻ' അല്ല, നിലനിൽപ്പിന്റെ ആവശ്യമാണ്.
അമ്മയുടെ മേലങ്കി
ദൈവത്തിൽനിന്നുള്ള അകൽച്ചയാണ് ഇന്നത്തെ എല്ലാത്തിന്മകളുടെയും കാരണം. അതുകൊണ്ടാണ് പരിശുദ്ധയമ്മ ഇത്ര ശക്തമായി വിളിക്കുന്നത്:
"എന്റെ മേലങ്കിക്കുള്ളിൽ വരിക."
ഇതൊരു കാവ്യാത്മകപ്രയോഗമല്ല. പരിശുദ്ധാത്മാവിന്റെ ശക്തിയാൽ ആവൃതമായ ദൈവീകസംരക്ഷണമാണത്. പരിശുദ്ധാത്മാവ് ആ വസ്ത്രത്തിൽ വസിക്കുന്നു. അതിനാൽ പിശാചിന് അവിടെ പ്രവേശനമില്ല.
ആ മേലങ്കിക്കു പുറത്തുനിൽക്കുന്നവർ ഭയത്തിൽ ജീവിക്കും; അകത്തുള്ളവർ സമാധാനത്തിലും. അമ്മയുടെയടുത്തേക്കുള്ള വഴി ലളിതമാണ്:
- അമ്മയുടെ സന്ദേശങ്ങൾ കേൾക്കുക, അനുസരിക്കുക.
- പ്രാർത്ഥന, മാനസാന്തരം, വിശുദ്ധജീവിതം എന്നിവ പാലിക്കുക.
മറിയം നമ്മെ നയിക്കുന്നത് ഈശോയിലേക്കാണ്; തന്റെ നിർമ്മലഹൃദയത്തിലൂടെ ഈശോയുടെ തിരുഹൃദയത്തിലേക്ക്.
വാർത്തകൾ കേട്ടു തളരരുത്. അമ്മയുടെ ഹൃദയത്തിൽ അഭയംതേടുക. നിർമ്മലഹൃദയത്തിൽ വസിക്കുന്നവൻ ഇരുട്ടിൽ നിൽക്കുകയില്ല.
ഇതു സമയത്തിന്റെ വിളിയാണ്. നാളെയല്ല, ഇന്ന്.
സമർപ്പണ പ്രാർത്ഥന
"പരിശുദ്ധയമ്മേ,
പാപത്താൽ അന്ധകാരത്തിലായ ഈ ലോകത്തെയും ഞങ്ങളെയും
അങ്ങയുടെ നീല മേലങ്കിക്കുള്ളിൽ ഇപ്പോൾത്തന്നെ സുരക്ഷിതമായി ഒളിപ്പിക്കണമേ.
പരിശുദ്ധാത്മാവിന്റെ ശക്തിയാൽ എല്ലാ തിന്മകളിൽനിന്നും ഞങ്ങളെ കാത്തുകൊള്ളണമേ.
അങ്ങയുടെ നിർമ്മലഹൃദയത്തിലൂടെ,
ഞങ്ങളെ ഈശോയുടെ തിരുഹൃദയത്തിന്റെ സ്നേഹത്തിലേക്ക്
നയിക്കുകയും ചെയ്യണമേ. ആമേൻ."
അബ്ബ ആൻ്റോ
No comments:
Post a Comment