നോമ്പുകാലചിന്തകൾ - ഏഴാം ദിവസം

വലിയനോമ്പിൻ്റെ നാല്പതു ദിനങ്ങൾ; നാല്പതു ചിന്തകൾ

ഏഴാം ദിവസം

​ചിന്താവിഷയം: എളിമ - മഹത്വത്തിലേയ്ക്കുള്ള പടി

​നമ്മുടെ ആത്മാവിനെ കഴുകി വെടിപ്പാക്കുന്ന പുണ്യകാലമാണു നോമ്പുകാലം. ഈ ആത്മീയയാത്രയിൽ നമ്മൾ  പിഴുതെറിയേണ്ട ഏറ്റവും വലിയ തിന്മയാണ് 'അഹങ്കാരം'. വിനയത്തിന്റെ പൂർണ്ണരൂപമായ ക്രിസ്തു, തന്റെ ശിഷ്യന്മാരുടെ പാദങ്ങൾ കഴുകിക്കൊണ്ടു ലോകത്തെപ്പഠിപ്പിച്ചത് അധികാരത്തിന്റെ ഭാഷയല്ല, ശുശ്രൂഷയുടെയും വിനയത്തിന്റെയും പാഠമാണ്. വിശുദ്ധഗ്രന്ഥം ആവർത്തിച്ചാവർത്തിച്ച് നമ്മളെയോർമ്മിപ്പിക്കുന്നു: "തന്നെത്തന്നെ ഉയര്‍ത്തുന്നവന്‍ താഴ്‌ത്തപ്പെടും; തന്നെത്തന്നെ താഴ്‌ത്തുന്നവന്‍ ഉയര്‍ത്തപ്പെടും" (ലൂക്കാ 14:11, മത്തായി 23:12). ഈ വചനം ക്രിസ്തീയജീവിതത്തിന്റെ വിജയരഹസ്യമാണ്.

​നമ്മുടെയുള്ളിലെ 'അഹന്ത'യെ ഉപേക്ഷിക്കുന്നതാണ് ഈ നോമ്പുകാലത്തു നമ്മൾ നേരിടുന്ന വലിയ വെല്ലുവിളി. ഞാൻ മറ്റുള്ളവരേക്കാൾ വലിയവനാണെന്ന ചിന്തയും മറ്റുള്ളവരെ വിധിക്കാനുള്ള പ്രവണതയും നമ്മുടെ ആത്മീയവളർച്ചയെ തടസ്സപ്പെടുത്തുന്നു. നമ്മുടെ കഴിവുകളും നേട്ടങ്ങളും ദൈവത്തിന്റെ ദാനമാണെന്നു തിരിച്ചറിയുമ്പോളാണ് വിനയാന്വിതരാകാൻ നമുക്കു സാധിക്കുന്നത്. എളിമയുള്ള ഹൃദയങ്ങളിലാണു ദൈവം വസിക്കുന്നത്.

കത്തോലിക്കാസഭയുടെ മതബോധനഗ്രന്ഥം (CCC) നമ്മളെ

 പഠിപ്പിക്കുന്നതിതാണ്: "എളിമയാണ് പ്രാർത്ഥനയുടെ അടിസ്ഥാനം. ഹൃദയത്തിൽ എളിമയോടെ പിതാവിനോടു ചോദിക്കുന്നവനാണ് ദൈവത്തിന്റെ ദാനം സ്വീകരിക്കാൻ പ്രാപ്തനാകുന്നത്" (Ref.CCC 2559). CCC 1866 ൽപ്പറയുന്ന നിഗളം (അഹങ്കാരം) എന്ന മൂലപാപത്തിനെതിരായ മൗലികപുണ്യമാണ് എളിമ.

​

വിശുദ്ധ അഗസ്റ്റിൻ പറയുന്നു: "നിങ്ങൾക്കു ദൈവത്തിലേക്കുയരണമെന്നുണ്ടെങ്കിൽ താഴേയ്ക്കിറങ്ങുക; വിനയമുള്ളവരാകുക." അഹങ്കാരം എല്ലാ പാപങ്ങളുടെയും ഉറവിടമാണെന്നും വിനയം എല്ലാ പുണ്യങ്ങളുടെയും അമ്മയാണെന്നും വിശുദ്ധർ നമ്മളെയോർമ്മിപ്പിക്കുന്നു.

​ഈ നോമ്പുകാലത്ത് മൂലപാപങ്ങളെ മൗലികപുണ്യങ്ങൾകൊണ്ടു നമുക്കു നേരിടാം. നിഗളത്തെ എളിമകൊണ്ടും കോപത്തെ ക്ഷമകൊണ്ടും അസൂയയെ പരസ്നേഹംകൊണ്ടും നമുക്കു കീഴ്പ്പെടുത്താം. (ഗലാത്തിയര്‍ 5:19-21). മറ്റുള്ളവരുടെ നേട്ടങ്ങളിൽ സന്തോഷിക്കാനും അവരുടെ വീഴ്ചകളിൽ അവരെ ആശ്വസിപ്പിക്കാനും നമുക്കു കഴിയണം.

ഇന്നെടുക്കേണ്ട തീരുമാനം:

ഇന്ന് ഞാൻ എന്നെത്തന്നെ പുകഴ്ത്താൻ ശ്രമിക്കില്ല. മറ്റൊരാളുടെ നന്മയെ തുറന്നമനസ്സോടെ അഭിനന്ദിക്കും.

​പ്രാർത്ഥന:

എളിമയുടെ മാതൃകയായ ഈശോയേ, എന്റെ ഹൃദയത്തിലെ അഹങ്കാരത്തെ നീക്കി, അങ്ങയുടെ ഹൃദയത്തിനു സമാനമായ എളിമ എനിക്കു നൽകണമേ. എല്ലാവരിലും അങ്ങയെ ദർശിക്കാനും സ്നേഹിക്കാനും എന്നെപ്പഠിപ്പിക്കണമേ. 

ആമേൻ.

​ഈ ചിന്ത നിങ്ങളെ സ്പർശിച്ചെങ്കിൽ നിങ്ങളുടെ മറ്റുള്ളവരുമായി ഇതിൻ്റെ ലിങ്ക്

 പങ്കുവെയ്ക്കണേ.

Please Share ✝️🙏